Narón, 9 de decembro de 2020. A alcaldesa, Marián Ferreiro, asinou esta mañá no Concello un convenio de colaboración co presidente do Club Tenis de Mesa Cidade de Narón, Fernando Montero, para promocionar este deporte e a participación do club en diferentes campionatos. O importe da achega que aportará o Concello é de 11.000 euros. No acto de sinatura estivo tamén presente o concelleiro de Deportes, José Oreona. “Un ano máis, en virtude a este acordo, dende o club fomentarase e potenciarase a práctica de tenis de mesa en diferentes categorías, dende a base ata a senior, e tamén seguiremos contando coa súa colaboración para organizar na cidade eventos vencellados a este deporte”, explicou Ferreiro. Trala sinatura do acordo Montero agradeceu a colaboración do Concello e a alcaldesa valorou o traballo que realizan e tamén felicitou ao representante do Tenis de Mesa Cidade de Narón polos resultados obtidos nas competicións nas que participan. Ferreiro desexoulles tamén moitos éxitos na nova tempada aos integrantes deste club local.