Novas
 
UNS 350 DEPORTISTAS PARTICIPARÁN ESTA FIN DE SEMANA NO XVIII TROFEO DE BAILE DEPORTIVO CIDADE DE NARÓN
O pavillón polideportivo da Gándara acollerá este evento o sábado pola tarde e o domingo todo o día, no que se inclúen a Copa Promoción Zona Norte e o Campionato Galego de Latinos
Narón, 9 de maio de 2019. O pavillón polideportivo da Gándara acollerá esta fin de semana, o sábado e o domingo, a décimo oitava edición do Trofeo de Baile Deportivo Cidade de Narón, a Copa Promoción Zona Norte e o Campionato Galego de Latinos. Uns 350 deportistas chegados de diferentes clubs galegos –no caso da Copa Promoción Zona Norte tamén doutras Comunidades- confirmaron a súa asistencia a esta convocatoria, presentada esta mañá pola alcaldesa da cidade, Marián Ferreiro, o concelleiro de Deportes, Román Romero, e Sandra García, do Club Baile Deportivo Narón. As entradas para o evento poden recollerse na entrada do pavillón polideportivo da Gándara.
No XVIII Trofeo de Baile Deportivo Cidade de Narón disputaranse catro disciplinas: Danza Coreográfica, Bailes Caribeños, Standard e Latino. Na xornada do sábado, entre as 17.45 e as 19.45 horas será o turno das modalidades de Danza Coreográfica e Bailes Caribeños, tal e como explicou Sandra García. Así mesmo, a representante do Club Baile Deportivo Narón avanzou que na xornada do domingo a competición desenvolverase todo o día. Entre as 10.30 e as 11.39 horas será o turno das disciplinas Standard e Copa Promoción Standard; entre as 11.59 e as 14.23 o de Latino e Copa Promoción Latino; de 15.08 a 19.08 celebrarase o Campionato Galego de Latinos e entre as 19.23 e as 20.40 será o turno de Latinos, nas categorías C, B e A.
Un total de sete xuíces, dous internacionais e cinco nacionais, encargaranse de valorar aos participantes nas diferentes disciplinas, de cara a determinar as clasificacións finais en cada unha delas.
García agradeceu a colaboración do Concello de Narón para poder desenvolver un ano máis este evento deportivo, que reúne cada ano a profesionais e aficionados ao baile deportivo. Pola súa banda, o edil de Deportes destacou a elevada participación, con máis de cen parellas e 350 deportistas, neste trofeo.
A alcaldesa da cidade, Marián Ferreiro, destacou o traballo que realiza o Club de Baile Deportivo Narón na cidade, con recoñecementos a nivel autonómico e nacional, sendo o que conta con maior número de licencias de España. Así mesmo, a rexedora animou á veciñanza de Narón e doutros concellos a achegarse esta fin de semana ao pavillón polideportivo da Gándara para poder gozar deste evento deportivo.



Últimas noticias
ABERTO O PRAZO DE INSCRICIÓN NA ÚLTIMA ANDAINA DO PROGRAMA MUNICIPAL "PONTE EN RUTA CON NÓS"
RECEPCIÓN OFICIAL Á NARONESA FANY CABARCOS BECEIRO TRAS PROCLAMARSE CAMPIONA DE EUROPA DE MTB DE DESCENSO NA CATEGORÍA MASTER 35 EN PORTUGAL
O PAVILLÓN MUNICIPAL DA GÁNDARA ACOLLERÁ O "XXVI TORNEO DE BALONMÁN CIDADE DE NARÓN"
A TRIXÉSIMO SEGUNDA EDICIÓN DO RALLYE CIDADE DE NARÓN REUNIRÁ ESTA FIN DE SEMANA NA CIDADE A 130 PILOTOS
O CONCELLO MANTÉN ABERTO ATA O 5 DE XULLO O PRAZO PARA SOLICITAR O ALUGUEIRO PARA USO DAS INSTALACIÓNS DEPORTIVAS MUNICIPAIS

Destacados

Outras webs municipais

   
 
Concello de Narón - Aviso legal