Narón, 11 de outubro de 2018. O Concello de Narón baixo o control técnico da Federación Galega de Atletismo organiza o domingo 4 de novembro a súa primeira Carreira 7-14-21, incluída dentro das actividades do Programa 100.000 motivos de peso, que se ven desenvolvendo dende hai meses. A carreira desenvolverase nun circuíto urbano de 7 quilómetros ao que se poderán dar ata tres voltas, dependendo da modalidade, de aí o nome de 7-14-21. O Concelleiro de Deportes, Román Romero, indicou que este modelo de carreira, recoñecido como oficial pola Federación Galega de Atletismo, non é moi coñecido na nosa bisbarra, polo que a proba nace con intención de se consolidar dentro do calendario deportivo de Narón. A inscripción na carreira, tanto para persoas federadas como para o público en xeral poden facerse antes do día 1 de novembro a través de facebook ou na páxina web www.carreirasgalegas.com, donde tamén se pode atopar toda a información sobre a mesma. Por último, o Concelleiro de Deportes animou a toda a veciñanza a participar nesta actividade e agradeceu a colaboración dos patrocinadores así como da Federación Galega de Atletismo.