Novas
 
PRETO DE 450 DEPORTISTAS PARTICIPARÁN NO XVII TROFEO DE BAILE DEPORTIVO E CAMPIONATO GALEGO DE DANZA COREOGRÁFICA CIDADE DE NARÓN
A alcaldesa, Marián Ferreiro, o edil de Deportes, Román Romero, e Sandra García, do Club Baile Deportivo Narón, presentaron o evento, que terá lugar o 22 de abril no pavillón polideportivo da Gándara
Narón, 18 de abril de 2018. O pavillón polideportivo da Gándara acollerá este domingo, 22 de abril, a décimo sétima edición do Trofeo de Baile deportivo e o Campionato galego de Danza coreográfica Cidade de Narón. A alcaldesa de Narón, Marián Ferreiro, presentou o evento acompañada polo concelleiro de Deportes, Román Romero, e Sandra García, do Club de Baile Deportivo Narón. A cita será, tal e como avanzou Ferreiro, a partir das 10.00 horas e contará coa participación de preto de 450 deportistas vencellados a diferentes clubes. As entradas para o evento poden recollerse na billeteira do Pavillón polideportivo da Gándara.
Sandra García explicou que a convocatoria constará de tres modalidades, “o Campionato galego de Danza coreográfica, no que participarán dezaséis equipos; a competición para o ranking nacional e unha nova modalidade da Federación Española de Baile deportivo sobre Ritmos caribeños”. O edil de Deportes, pola súa banda, incidiu en que o Trofeo de Baile deportivo será puntuable para o ranking nacional, destacando que a maiores de clubes galegos, maioritarios, participarán outros procedentes de comunidades como Madrid ou Santander. A representante do Club de Baile Deportivo Narón indicou que cinco xuíces nacionais encargaranse de puntuar aos deportistas.
No Campionato galego de Danza coreográfica participarán dous grupos campións de España o ano pasado e outros dous subcampións tamén a nivel estatal en 2017, integrantes todos eles do clube naronés, tal e como recordou Sandra García, que agradeceu a colaboración, un ano máis, do Concello de Narón neste evento.
“Para o Concello é un honor poder contar con esta proba no calendario de competicións deportivas da nosa cidade”, asegurou Marián Ferreiro. A alcaldesa destacou a labor e os logros do Club de Baile Deportivo Narón na súa traxectoria, que é o que conta con maior número de licencias de España.
A rexedora local e o edil de Deportes animaron ás veciñas e veciños de Narón e comarca a acudir o vindeiro domingo a esta convocatoria “na que poderemos gozar do traballo que a nivel de baile e danza se realiza tanto na cidade como noutros concellos de Galicia e mesmo de España”.



Últimas noticias
O "XXXI RALLYE CIDADE DE NARÓN" REUNIRÁ ESTA FIN DE SEMANA A 139 PARTICIPANTES
O CONCELLO CELEBRARÁ O VINDEIRO DÍA 30 DE XUÑO NA GÁNDARA A FESTA DO DEPORTE
O CONCELLO COLABORA NO "I CAMPUS DE FÚTBOL E PÁDEL" QUE SE CELEBRARÁ A PARTIR DO 2 DE XULLO
UNHAS 120 PERSOAS PARTICIPARÁN NA "II CARREIRA POPULAR DE ORIENTACIÓN CIDADE DE NARÓN"
MÁIS DE DUAS MIL PERSOAS PARTICIPARON NAS ANDAINAS DA TERCEIRA EDICIÓN DO PROGRAMA MUNICIPAL "PONTE EN RUTA CON NÓS"

Destacados

Outras webs municipais

   
 
Concello de Narón - Aviso legal