Narón, 29 de xaneiro de 2017. A terceira andaina convocada no marco da segunda edición do programa municipal “Ponte en ruta con nós”, reuniu a un total de duascentas setenta persoas. O éxito desta convocatoria, impulsada desde o Padroado de Deportes de Narón e a empresa Arasti Barca, consolídase a medida que avanza no tempo, tal e como se reflicte na excelente acollida que ten entre a veciñanza. Nesta ocasión os caminantes percorreron un tramo duns catorce quilómetros dunha ruta circular, con saída e chegada ao Castelo da Palma, no concello de Mugardos. Sdgfrg A vindeira saída programada adiantarase uns días debido á celebración do Entroido, polo que en lugar de celebrarse o 26 de febreiro, tal e como se anunciou inicialmente, será o día 19 do vindeiro mes de febreiro. Non haberá cambio algún, apuntaron, no percorrido a realizar, que será polo Alto da Lagoa, con saída de Baltar. O punto de recollida dos participantes será na cooperativa de Covas, ás 9.15 horas As persoas interesadas en inscribirse na próxima andaina poderá facelo a partir do vindeiro mércores, 1 de febreiro, nas instalacións do pavillón polideportivo da Gándara, abonando a cota establecida, de tres euros. O horario para anotarse é de luns a xoves de 10.00 a 13.00 e de 16.30 a 18.30 e os venres de 9.00 a 13.00. As prazas son limitadas e non poderán acudir menores se non van acompañados por un adulto.